2024 жылдың 21–22 қарашасында Алматы қаласында академик Қаныш Сәтбаевтың 125 жылдығына арналған Қазақстан жас ғалымдарының I Конгресі өтті. Бұл іс-шара Қазақстан Республикасы Президентінің жанындағы Қазақстан Республикасының Ұлттық ғылым академиясы ұйымдастырды және Премьер-Министрдің орынбасары Тамара Дүйсенованың бекіткен республикалық жоспарына сәйкес жүзеге асырылды.
2024 жылдың 22 қарашасында, Almaty Management University-де (AlmaU) «Ғылыми және (немесе) ғылыми-техникалық қызмет нәтижелерін коммерцияландыру» тақырыбында секциялық конференция өтті.
Конференция модераторлары:
- Табынов Қайсар Қазыбайұлы, Қазақ ұлттық аграрлық зерттеу университетінің Халықаралық вакцинология орталығының директоры, ветеринария ғылымдарының кандидаты, профессор.
- Тастанбеков Диас Бақытжанұлы, ҚР ҰҒА Жас ғалымдар кеңесі президиумының мүшесі, әл-Фараби атындағы Қазақ ұлттық университетінің аға оқытушысы, ф.ғ.к.
Конференцияның ашылуында AlmaU коммерцияландыру жөніндегі проректоры Кендрик Уайт конференцияның маңыздылығын атап өтті:
«Мен жас ғалымдар Қазақстанның болашағы екеніне сенімдімін. Ғылымның дамуы және оны коммерцияландыру ел экономикасының өсуінің негізгі факторлары болып табылады. Жоғары технологияларға инвестициялау тәжірибемнен, кірістің салымнан төрт есе асып түсуі бұл бастамалардың маңыздылығын дәлелдейді».
AlmaU-дың Технологияларды Коммерцияландыру Орталығы Қазақстан Республикасының Ұлттық ғылым академиясымен және 12 жетекші университеттің коммерцияландыру альянсымен бірлесіп жұмыс істейді. Бұл орталық зерттеуші ғалымдарға инновациялық стартап-командалар құруға қолдау көрсетуді мақсат етеді. 2022 жылы құрылған ТКО AlmaU «InnoBoost Winter – 2024» жобасы, «Demo Day» ғылыми көрмесі сияқты бастамаларды жүзеге асырып, бірқатар табыстарға жетті.
Конференция бағдарламасы аясында баяндамашылар ғылыми-техникалық қызметке қатысты ауқымды тақырыптарды қамтитын баяндамалар жасады. Диеталық және профилактикалық тамақтануға арналған мамандандырылған азық-түлік өнімдерін әзірлеу, жасанды интеллект негізіндегі сөйлеу технологияларын қолдану, өндіріс пен ауыл шаруашылығында инновациялық шешімдерді қолдану, сондай-ақ Қазақстанның жетілген кен орындарында мұнай өндіруді арттыру мәселелері талқыланды. Спикерлер биотехнология және косметика саласындағы технологияларды коммерцияландыру тәжірибесімен, сондай-ақ ұлттық ғылыми-зерттеу институттарындағы ғылыми нәтижелермен бөлісті.
Бұл іс-шара ғылым мен технологияны дамытудың болашағын талқылауға арналған маңызды алаң болды. AlmaU Технологияларды Коммерцияландыру Орталығы жас ғалымдар мен стартапшыларды қолдауды жалғастырып, Қазақстан экономикасын дамытуға үлес қосады.