2026 жылдың 21 қаңтарында AlmaU ресми сапармен С.Д. Асфендияров атындағы Қазақ ұлттық медицина университеті басшылығының делегациясын қабылдады. Делегацияны басқарма төрағасы – ректор Марат Шоранов бастап келді.
Сапар AlmaU кампусымен таныстыру экскурсиясынан басталды. Қонақтар нейромаркетинг зертханасын, AI Lab – жасанды интеллект орталығын, жаңартылған оқу аудиторияларын, кітапхананы, атриумды және университеттің өзге де инфрақұрылымдық нысандарын аралады.
Кездесуге AlmaU тарапынан университеттің негізін қалаушы әрі президенті Асылбек Кожахметов, ректорат мүшелері, мектеп декандары және құрылымдық бөлімшелердің басшылары қатысты. Ал С.Д. Асфендияров атындағы ҚазҰМУ делегациясы құрамында проректорлар, институттар мен департаменттердің жетекшілері, сондай-ақ Қоғамдық денсаулық сақтау мектебінің деканы болды.
Сапар аясында AlmaU-дың бірінші проректоры Тимур Булдыбаев өзінің баяндамасында университеттің миссиясын, академиялық даму нысандарын және халықаралық әріптестік бағыттарымен таныстырды.
Сонымен қатар Sharmanov School of Health Sciences қызметіне ерекше назар аударылды. Мектеп директоры Аида Салимжанқызы мектептің қызметімен таныстырып, денсаулық сақтау, қоғамдық денсаулық және тұрақты даму салаларындағы негізгі бастамаларды баяндады.
Сапар қорытындысы бойынша тараптар бірлескен білім беру бағдарламаларын іске асыру, ғылыми зерттеулер жүргізу, сондай-ақ цифрландыру және медициналық білім беру саласындағы жобаларды дамыту бағыттарында өзара ынтымақтастықтың жоғары әлеуетін атап өтті.
