AlmaU университетінің омбудсмені болып философия ғылымдарының кандидаты, профессор Emerita, AlmaU Медиа және кино мектебінің қауымдастырылған профессоры Хан Ирина Гурьевна тағайындалды. Ол 2014-2017 жылдары да осы қызметті атқарған. Енді Ирина Гурьевна жоғары білім беру, мемлекеттік басқару және университеттің академиялық ортасындағы мол тәжірибесін пайдалана отырып, омбудсмен міндетін қайта атқарады.
Ирина Гурьевна AlmaU-да 2011 жылдан бері еңбек етіп келеді. Қазіргі уақытта университеттің Этика комиссиясының мүшесі, Бакалавриат бағдарламалары департаментінің деканы және академиялық мәселелер жөніндегі кеңесшісі, сондай-ақ Медиа және кино мектебінің Академиялық сапа комитетінің мүшесі. Оның кәсіби тәжірибесі университет қауымдастығының әртүрлі өкілдерінің – студенттердің, оқытушылар мен қызметкерлердің мүдделерін ескеруге мүмкіндік береді.
Ирина Гурьевнаның жоғары білім беру және мемлекеттік басқару саласындағы еңбек өтілі 50 жылды құрайды. Осы уақыт ішінде ол халықаралық құқық факультетін және «Әділет» құқық мектебін басқарған, сондай-ақ Ұлттық саясат жөніндегі мемлекеттік комитетте қызмет атқарған. Заң жоғары оқу орнындағы он жылдық тәжірибесі құқықтық тетіктер мен түрлі тараптар арасындағы өзара іс-қимыл қағидаттарын терең түсінуіне негіз болды.
Сонымен қатар Ирина Гурьевна шешендік өнер зертханасын басқарады және білім беру сапасы мәселелеріне арналған халықаралық конференцияларда баяндама жасайды. 2017 жылы AlmaU оған профессор Emerita құрметті атағын берді.
Омбудсмен институты 2014 жылы еңбек ұжымының бастамасымен және AlmaU оқу орны басшылығының қолдауымен құрылған. Омбудсменнің негізгі міндеті – университетте қауіпсіз, ашық әрі өзара құрметке негізделген орта қалыптастыруға ықпал ету. Бұл – әрбір студентке, оқытушыға және қызметкерге университет өміріне қатысты өз сұрақтары мен мәселелерін еркін талқылауға мүмкіндік беретін кеңістік.
Осылайша, омбудсмен институты өзара құрмет, сенім, әділдік және сындарлы диалог қағидаттарына негізделген университет мәдениетін дамытудағы маңызды тетіктердің бірі болып табылады.