2026 жылдың тамыз айында AlmaU-нің Нейромаркетинг және нейроменеджмент зертханасының командасы Латвияның Рига қаласында бір ай бойы зерттеу сапарымен болып, EKA University of Applied Sciences (Ekonomikas un kultūras augstskola) университетінің әріптестерімен ғылыми және академиялық тәжірибе алмасты. Сапар Erasmus+ академиялық мобильдік бағдарламасы аясында ұйымдастырылды. Оның негізгі мақсаты – латвиялық әріптестермен тәжірибе алмасу, бірлескен зерттеулерді жоспарлау және ынтымақтастықтың жаңа бағыттарын дамыту.
AlmaU мен EKA арасындағы серіктестік бизнестегі қолданбалы нейроғылымға, тәжірибеге бағытталған оқытуға, сондай-ақ қазіргі заманғы талаптарға сәйкес нейромаркетинг пен нейроменеджментті академиялық және кәсіби бағыттар ретінде дамытуға деген ортақ қызығушылыққа негізделген.
AlmaU делегациясының құрамына зертхана жетекшісі Акдана Абужалитова, сондай-ақ зерттеушілер тобының мүшелері Александра Панкратова және Гулсанат Бекенова кірді.
Сапар барысында AlmaU командасы EKA қызметкерлеріне зертхананың негізгі қызмет бағыттары бойынша бірқатар тренингтер өткізді. Атап айтқанда, нейромаркетинг және нейроменеджмент әдістері, зерттеулерді жобалау, сондай-ақ респонденттердің мінез-құлқы мен зейіні туралы деректерді интерпретациялау мәселелері қамтылды.
Өз кезегінде EKA университетінің әріптестері қазақстандық командаға CleverPoint VR-жабдығының мүмкіндіктерін таныстырып, оны қолдану бойынша практикалық оқыту жүргізді.
CleverPoint – физиологиялық сенсорларды VR-шлемнің өзіне біріктіретін платформа. Адам виртуалды ортада болған кезде жүйе мидың электрлік белсенділігін, көз қозғалысын және бет бұлшықеттерінің белсенділігін синхронды түрде тіркеп, жүрек соғу жиілігін өлшейді. Нәтижесінде зерттеушілер адамның назарын, стресс деңгейін, вовлеченностін және эмоционалдық реакцияларын объективті түрде бағалай алады. Бұл дәстүрлі сауалнама арқылы алынатын субъективті бағалаудан әлдеқайда кең ақпарат алуға мүмкіндік береді.
VR-орталар мен физиологиялық өлшемдерді үйлестіру зертханалардың әдістемелік мүмкіндіктерін кеңейтіп, оқыту мен кадрларды іріктеуден бастап өнімдер мен сервистерді тестілеуге дейінгі түрлі зерттеу сценарийлерін жүзеге асыруға жол ашады.
ARS медициналық орталығы үшін жүргізілген зерттеу
Сапардың маңызды бөлігі AlmaU және EKA зертханаларының халықаралық командасы жүзеге асырған далалық зерттеу болды. Зерттеу Латвиядағы ең ірі жеке көпсалалы медициналық мекемелердің бірі – ARS медициналық орталығы (Medicīnas sabiedrība ARS) үшін жүргізілді.
Зерттеу барысында медициналық орталықтың негізгі ішкі мүдделі тараптары пайдалануға арналған жаңадан әзірленген ақпараттық жүйесі зерттелді.
Команда статикалық айтрекинг әдісін пайдаланып, жүйемен оның нақты пайдаланушылары – дәрігерлер мен тіркеушілердің қалай жұмыс істейтінін бақылап, тіркеді. Бұл әдіс адамның өз тәжірибесі туралы не айтатынын ғана емес, жүйемен жұмыс істеу барысында оның нақты әрекеті мен реакцияларының қалай өзгеретінін анықтауға мүмкіндік береді.
AlmaU Нейромаркетинг және нейроменеджмент зертханасы үшін бұл халықаралық деңгейдегі қолданбалы зерттеуге қатысудың және жаңа зерттеу әдістерін тәжірибеде қолданудың құнды мүмкіндігі болды. Ал серіктестер үшін зерттеу адамдардың мінез-құлқы мен реакциялары туралы объективті деректерге негізделген практикалық қорытындылар алуға мүмкіндік берді.
Зерттеу барысында жиналған деректер AlmaU мен EKA арасындағы бірлескен ғылыми жұмыстың нәтижесі ретінде халықаралық рецензияланатын журналда жарияланатын ғылыми мақалаға негіз болуы мүмкін.
Сапар қорытындысы бойынша тараптар ынтымақтастықты одан әрі тереңдетуге келісті. Алдағы жоспарлардың қатарында бірлескен зерттеу жобаларын іске асыру, оқытушылар мен студенттер алмасуын дамыту, сондай-ақ нейромаркетинг пен нейроменеджмент саласында ортақ білім беру шешімдерін әзірлеу бар.
AlmaU стратегиясын іске асыру аясында мұндай жобалар университеттің халықаралық зерттеу қауымдастығына жүйелі түрде интеграциялануына және зертхананы академиялық әдістерді бизнестің және қоғамдық сектордың нақты мәселелерін шешуге қолданатын зерттеу алаңына айналдыруға бағытталған жұмыстың бір бөлігі болып табылады.
Анықтама: AlmaU Нейромаркетинг және нейроменеджмент зертханасы нейроғылым әдістерін қолдана отырып, тұтынушылардың мінез-құлқын және шешім қабылдау үдерістерін зерттейді.