AlmaU-дің 2012 жылғы MBA бағдарламасының түлектері – кәсіпкерлер Ақмарал Имашева, Наби Айтжанов және Рустем Бибалинов – 2026 жылы AlmaU-ға оқуға түскен талапкерлерге үш білім беру грантын бөлді.
Ақмарал Имашева үшін болашақ студенттерді қолдау туралы шешім оның жеке тәжірибесімен байланысты. Кәсіпкер әрі iQanat әлеуметтік-білім беру жобасының қамқоршылық кеңесінің мүшесі білім жолының басында отбасы қаржылық қиындықтарға тап болғанын еске алады. Осы тәжірибе бүгінде білім алуға және өз әлеуетін жүзеге асыруға ұмтылған жастарға мүмкіндік жасауға деген талпынысының себептерінің біріне айналды.
«Мектепті бітірген кезде отбасымда белгілі бір қаржылық қиындықтар болды, сондықтан ақылы білім алу мен үшін оңай болған жоқ. Мен оқу мен жұмысты қатар алып жүріп, қаржылық мәселелерімді өзім шештім. Бұл тәжірибе маған көп нәрсе үйретті, мінезімді шыңдап, мықтырақ болуға көмектесті. Бірақ бір мезетте оқып, жұмыс істеп, білім алудың қаржылық жағын ойлау қаншалықты қиын болғанын жақсы есімде сақтадым. Сондықтан бүгінде талантты әрі еңбекқор жастарды қолдап, олардың оқуына көңіл бөлуіне, болашағын құруға көмектесетін мамандық, білім мен дағдылар алуына мүмкіндік бергім келеді», – деп атап өтті ол.
Бұл бастаманы оның MBA бағдарламасындағы курстастары – Наби Айтжанов пен Рустем Бибалинов та қолдады.
«Наби мен Рустемнің бұл бастаманы қолдағанына ризамын. Әрқайсымыздың өз жобаларымыз, бизнесіміз және жауапкершілігіміз бар. Сонымен қатар ресурстарымыздың бір бөлігін басқа адамдарға мүмкіндік жасауға бағыттай алатынымызды түсінеміз», – дейді Ақмарал.
Түлектердің өздері үшін бұл бастама олардың білім алу тарихының жалғасы болды. 2012 жылы олар MBA бағдарламасында оқып, қатарынан жұмыс істеп, өз бизнестерін дамытты. Оқу барысында алған білімдерін бірден тәжірибеде қолдануға – басқарушылық шешімдерді қайта қарауға, бизнесті дамытудың жаңа тәсілдерін іздеуге және кәсіби байланыстар қалыптастыруға мүмкіндік алды.
«Біз бизнесті бастаған кезде, бұл бағытта бізді ешкім оқытқан жоқ. Күндіз жұмыс істеп, кешке MBA бағдарламасында білім алдық. Бүгінде сол кезеңде алған біліміміз бен тәжірибеміздің біз үшін қаншалықты маңызды болғанын түсінеміз», – дейді түлектер.
Наби Айтжанов үшін білімнің құндылығы адамның оқу барысында алған білімінде ғана емес, оны нақты өмірде қолдана білуінде.
«MBA бізге өз тәжірибеміз арқылы үйреніп, алған білімімізді бірден бизнесте сынап көруге мүмкіндік берді. Ол кезде оқу процесінің бір бөлігі болып көрінген көптеген шешімдер уақыт өте келе кәсіби ұстанымымыздың негізіне айналды. Сондықтан бүгін өз жолын енді бастап келе жатқан жастарға да осындай мүмкіндік беру біз үшін маңызды», – дейді ол.
Рустем Бибалинов түлектер үшін бүгін талапкерлерді қолдаумен қатар, олардың кәсіби болашағын өз бетінше анықтауына мүмкіндік беру де маңызды екенін атап өтті.
«Бүгінде біз бұл жастарға өздерінің білім жолын бастауға мүмкіндік беріп отырмыз. Олардың бірі болашақта өз бизнесін құруы мүмкін, енді бірі мықты маман атанып, өз саласының дамуына үлес қосуы мүмкін. Біз үшін олардың алғашқы қадамында қолдау көрсетіп, әлеуетін ашуға көмектесетін мүмкіндіктер беру маңызды», – деп бөлісті ол.
Бүгін де білім беру гранттарын алған үш талапкер AlmaU-да оқуын бастауға дайындалып жатыр. Шешім қабылданғанға дейін олар түлектермен сұхбаттасудан өтті. Түлектер үшін болашақ студенттермен жеке танысып, олардың мақсаттары мен уәждерін білу маңызды болды.
AlmaU үшін бұл оқиға университет қауымдастығының оқу аяқталғаннан кейін де дамуын жалғастыратынын көрсетеді. Түлектің университетпен байланысы кәсіби ынтымақтастық пен менторлықтан бастап, университет өміріне қатысуға және студенттердің келесі буынын қолдауға дейін әртүрлі формада жалғаса алады.
Сондықтан MBA түлектерінің өздері бұл бастама AlmaU қауымдастығында кеңірек дәстүрдің бастамасына айналады деп үміттенеді – білім және кәсіби жолынан өткендер енді өз жолын бастап келе жатқан жастарға қолдау көрсететін дәстүрге.
«Осындай оқиғалар көп болғанын қалар едім. Бұл бастаманы AlmaU-дың басқа да түлектері қолдап, еліміздегі жетекші бизнес-университеттердің бірінде жастардың білім алуына қолдау көрсету жақсы дәстүрге айналса екен», – деп бөлісті Ақмарал Имашева.
Осылайша, 2012 жылғы MBA бағдарламасының үш түлегінің тарихы AlmaU-дың кеңірек тарихының бір бөлігіне айналады – жылдар өтсе де бірге өсіп, өзгеріп, байланысын сақтап келе жатқан қауымдастықтың тарихына.