Almaty Management University (AlmaU) базасында жаңа жаһандық жағдайда көшбасшылықтың трансформациялануына арналған дөңгелек үстел өтті. Талқылауға белгілі қоғам қайраткерлері мен сарапшылар – ғылыми орталықтар мен жоғары оқу орындарының өкілдері, аналитикалық және зерттеу ұйымдары, академиялық институттар, әлеуметтік зерттеу орталықтары, қоғамдық бірлестіктер, бұқаралық ақпарат құралдары мен корпоративтік сектор мамандары қатысты.
Қатысушылар қатарында – Е. Есенгараев, Ж. Жандосова, Р. Шер, Ұ. Сүлеймен, А. Бисенбаев, А. Әлжанова, С. Бейсембаев, А. Әмірова, Р. Абрахманов, В. Колточник, С. Коновалов, С. Садиева, А. Елібаева, С. Дәулет, Т. Бұлдыбаев және басқа да сарапшылар болды.
Кездесуді AlmaU университетінің коммуникациялар және студенттерді дамыту жөніндегі проректоры Дидар Марданов ашып, университеттің қоғамдағы өзгерістерге белсенді араласып, оң өзгерістерге үлес қосуға ұмтылатынын атап өтті.
Пікірталас барысында сарапшылар қазіргі таңда көшбасшыларға қойылатын талаптар ғана емес, көшбасшылықтың философиясы да түбегейлі өзгеріп жатқанын айтты. Бүгінгі көшбасшы – жай ғана харизмасы бар басшы емес, ол қоғам сұранысын түсінетін, әлеуметтік-экономикалық жағдайды, халықаралық ахуалды, ұлттық мәдени және тарихи ерекшеліктерді ескере алатын стратег және аналитик болуы тиіс.
Қатысушылар көшбасшылардың кәсіпкерлік ойлауын дамыту қажеттілігіне ерекше назар аударды. Қиын жаһандық жағдайларда тек жүйені сынау жеткіліксіз – маңыздысы нақты шешімдер ұсыну, тұрақты іскерлік және серіктестік байланыстар орнату, коалициялар құру және нақты нәтижелерге қол жеткізу.
Талқылау қорытындысы бойынша ортақ ұстаным тұжырымдалды: Қазақстанға жергілікті деңгейден ұлттық деңгейге дейін жаңа буын көшбасшыларын жүйелі түрде дайындау қажет. Тұрақты экономикалық өсуге, гуманитарлық прогреске және саяси жаңғыруға ұмтылатын ел кәсіби дайындалған, патриоттық ұстанымы берік және жауапты көшбасшыларға сүйенуі тиіс.
Кездесудің маңызды нәтижелерінің бірі – AlmaU базасында Көшбасшылық институтының құрылатыны жөнінде хабарланды. Бұл туралы AlmaU Жоғары бизнес мектебінің DBA бағдарламасы директоры Айгерім Елібаева мәлімдеді. Жаңа институт Өзекті саясат институтымен (ICP) серіктестікте құрылып, университеттің дербес білім беру құрылымына айналады.
Бұл бастама академиялық орта мен сараптамалық қауымдастықты, азаматтық қоғам институттарын біріктіру жөніндегі жаһандық трендтерге сай келеді. Бұл әсіресе геосаяси тұрақсыздық пен жаһандық басқарудың ыдырауы жағдайында өзекті болып отыр.
Көшбасшылық институты Президент Қасым-Жомарт Кемелұлы Тоқаев ұсынған «Әділетті Қазақстан» құру және «тыңдаушы мемлекет» тұжырымдамаларын іске асыру идеяларымен үндеседі. Мұндай мақсаттарға жету үшін тек кадрлық қамтамасыз ету емес, сондай-ақ көшбасшылыққа лайық тұлғаларды дайындау қажет. Жаңа сападағы көшбасшылар ғана осындай міндеттерді орындауға мүмкіндік береді – бұл бүгінгі Қазақстанда, менеджмент пен көшбасшылық негіздерін үйрететін көптеген орталықтардың барлығына қарамастан, әлі де жетіспейтін маңызды нәрсе. Бұл – жай ғана менторлық емес, көшбасшыны қалыптастыратын шабыт беретін әрі мазмұнды білім беру процесі болуы тиіс.