2025 жылдың 19-21 қарашасы аралығында университет атриумында «Өмір салты – экспедиция» атты деректі киноның II фестивалі өтті. Іс-шараны AlmaU, Қазақстан мен Ресейдің қоғамдық географиялық ұйымдары – Qazaq Geography және Ресей географиялық қоғамы, сондай-ақ Қазақстандағы ең көне экологиялық қоғамдық ұйым – «Табиғатты қорғау қазақстандық қоғамы» ұйымдастырды.
Фестиваль тарихи-мәдени мұраны және табиғи алуан-түрлілікті сақтау саласындағы ынтымақтастықты дамытуға, танымдық және зерттеушілік қызметке қызығушылықты арттыруға, сондай-ақ мамандар мен энтузиастарды экспедициялық жұмысқа жұмылдыруға бағытталды.
«Туран ТВ» телеарнасының бас директоры, Qazaq Geography ұйымының Алматы облысындағы өкілі Роман Ботабеков атап өтті:
«Биыл қазақ халқының ұлы перзенті – гуманист, зерттеуші, саяхатшы және әдебиетші Шоқан Уалихановтың туғанына 190 жыл толып отыр. Ол өз заманынан озып, дала мен Ресей географиялық қоғамының “жоғары” кабинеттерін байланыстырды. Біздің түсінігімізде Шоқан Уалиханов – екі әлемді, екі мемлекет пен екі халықты жалғаған көпір. Оның тартымдылық күші бүгін де ғалымдар мен деректі фильм жасаушыларды біріктіріп отыр. Қазанда AlmaU университетімен бірлесіп халықаралық конференция өткіздік, ал жазда Уалихановтың ізімен Ыстықкөл мен Қашқарға экспедиция ұйымдастырдық. Түсірілген материалдың бір бөлігі фестиваль көрермендеріне ұсынылды».
2025 жылы «Туран ТВ» телеарнасы мен AlmaU студенттердің күшімен өзекті экологиялық және әлеуметтік тақырыптар бойынша телебағдарламалар, фильмдер және бейнероликтер жасауды қолға алуды жоспарлап отыр. Жас авторлардың өздері тақырып ұсынуға, сценарий жазуға, түсірілім мен монтаж жүргізуге, сондай-ақ жұмыстарын әлеуметтік желілерде ілгерілетуге мүмкіндік алады. Ең үздік жобалар «Туран ТВ» телеарнасында көрсетіліп, 2026 жылдың қарашасында өтетін фестивальдің конкурс бағдарламасына енеді. Сонымен қатар, ұйымдастырушылар келесі жылы фестиваль ауқымын кеңейтіп, оны еуразиялық форматқа шығаруды жоспарлап отыр.