2025 жылғы 2 қазанда, Дүниежүзілік туризм күніне орай, тау курорты «Oi Qaragai» аумағында Almaty Tourism Bureau ұйымдастырған ауқымды іс-шара – Sharing Hub «Алматы және әлем: туризмнің жаңа көкжиектері» өтті. Форум Орталық Азиядағы туризм саласының даму перспективаларын талқылауға, Алматының аймақтың жетекші туристік бағыты ретінде имиджін нығайтуға және бизнес, білім мен мәдениет өкілдері арасындағы тәжірибе алмасуға арналған маңызды алаңға айналды.
Бағдарлама және атмосфера
Іс-шара бағдарламасы стратегиялық бастамалар мен сәтті кейстерді, жаңа жобалар мен сарапшылардың баяндамаларын, сондай-ақ мәдени және гастрономиялық бөлімдерді қамтыды. Тау бөктеріндегі көркем табиғат аясында қатысушылар туризм мен мәдениет, спорт және білім салаларының бірігу мүмкіндіктерін, жаһандық трендтер мен жаңа жұмыс форматтарын талқылады.
Негізгі спикерлер
- Руслан Жанабаев (Almaty Tourism Bureau) — Visit Almaty турбрендін стратегиялық дамыту және қаланы халықаралық деңгейде танымалдылығын арттыру жөнінде;
- Рус Бикетов («Целинный» заманауи өнер орталығы) — аймақ суретшілері мен зерттеушілерін біріктіретін мәдени жобалар туралы;
- Алиса Кин (Almaty Museum of Arts) — жаңа мұражайдың 18 күнде 60 000-нан астам келушіні қабылдаған жетістіктері туралы;
- Ержан Бримжанов («Бірінші болуға батылдық» Қоры) — спорттық туризм мен Орталық Азиядағы ең ірі жүгіру бойынша Almaty Marathon-ның болашағы туралы;
- Артём Якупов (Oi Qaragai) — белсенді және экологиялық туризм орталығы ретіндегі курорттың әлеуеті туралы;
- Жанар Нұрлыбек (гастроэксперт) — гастрономияның қаланың туристік тартымдылығына әсері туралы.
AlmaU қатысуы
AlmaU «Менеджмент және туризм» мектебінің бағдарлама лидері Искендирова Г.К. және оқытушы Калияскарова Э.А. қонақжайлық саласындағы қызықты кейстермен бөлісе отырып, туризм индустриясы мен ғылымды интеграциялаудың маңыздылығын атап өтті. Мұндай форумдарға қатысу университет студенттеріне саланың өзекті үрдістерінен хабардар болып, кәсіби қауымдастықпен байланыс орнатуға мүмкіндік береді.
Форум қорытындылары
Іс-шараның соңында Turkish Airlines, Air Astana және Алматының жетекші мейрамханалары сыйлықтар ұсынған ұтыс ойыны өтті.
«Біз Алматыны ұмытылмас әсердің, оқиғалардың, сервистің, қонақжайлылық пен гастрономияның сапасы үшін таңдалатын қалаға айналдыруға ұмтыламыз. Бүгінде тағам – тұрғындар мен қонақтарды біріктіретін мәдениетаралық диалогтың тіліне айналды. Біз кәсіби қауымдастық және серіктестерімізбен бірге жаңа көкжиектер ашып, мәдениет, дәм мен эмоциялар тоғысқан бірегей тәжірибе кеңістігін қалыптастырамыз», — деді Almaty Tourism Bureau директоры Дияр Аскаров.
Іс-шара Алматының мәдени мұрасы мен табиғи бірегейлігі заманауи инфрақұрылыммен үйлескен, туризм мен креативті экономиканың серпінді орталығы ретіндегі мәртебесін тағы бір мәрте дәлелдеді.