2026 жылғы 6-10 сәуір аралығында Алматы Менеджмент Университетінде зерттеу құзыреттіліктерін дамытуға және ғылыми қызметті бағалаудың өзекті мәселелерін талқылауға бағытталған іс-шаралар сериясы – AlmaU Research Impact Week өтеді.
Ғылым апталығы аясында заманауи зерттеу практикасының негізгі аспектілерін қамтитын шеберлік сыныптары, семинарлар мен воркшоптар жоспарланған. 6 сәуірде бағдарлама ҚР Ғылым және жоғары білім министрлігі Ғылым комитеті Экономика институтының «Zertteu LAB» зертханасының меңгерушісі, PhD Молдабекова Айсұлу Тұрсынбайқызының жетекшілігімен өтетін «Әлеуметтік-экономикалық зерттеулердегі цифрлық іздер: мүмкіндіктер, шектеулер және методологиялық қиындықтар» атты семинарымен ашылады.
7 сәуірде Informascope компаниясының Орталық Азия бойынша кеңесшісі Рабиға Қожамқұлдың қатысуымен «Табысты мақала жазу үшін Scopus және Elsevier-дің басқа да құралдарын пайдалану» воркшопы өтеді.
8 сәуірде «МашСвар» ЖШС директорының орынбасары, коммерцияландыру саласындағы сарапшы Әкәлім Досжан Әлібекұлы ғылыми жобаларды коммерцияландыруға өтінім жазу бойынша шеберлік сыныбын өткізеді.
Апталықтың басты оқиғасы — 9 сәуірде AI LAB-та өтетін AlmaU Research Impact Dialogue пікірталас алаңы. Іс-шара сарапшыларды, зерттеушілерді және ғылыми қоғамдастық өкілдерін қазіргі жағдайдағы ғылыми импакттың рөлін талқылау үшін біріктіреді. Назарда – сандық метрикалардың ғылымның дамуына әсері, жарияланымдық белсенділік пен зерттеулердің нақты үлесінің арақатынасы, сондай-ақ ғылыми нәтижелерді бағалаудың мазмұнды тәсілдерін іздеу.
10 сәуірде ғылым апталығы «Антиплагиат» компаниясының оқу-әдістемелік орталығының жетекші маманы Филиппова Ольга Анатольевнаның «ИИ дәуіріндегі академиялық адалдық: «Антиплагиат» жүйесі авторлар мен тексерушілерге қалай көмектеседі» атты шеберлік сыныбымен, сондай-ақ Young Researchers Lab ұйымдастырған студенттердің ғылыми жобалар байқауымен аяқталады.
Қатысуға ғылымды дамытуға және зерттеу сапасын арттыруға мүдделі оқытушылар, зерттеушілер, докторанттар, магистранттар мен студенттер шақырылады.