2026 жылдың 22 наурызында АҚШ-тың Калифорния штатындағы Голливуд қаласында Америкалық Мемлекеттік Басқару Қоғамының (American Society for Public Administration, ASPA) жыл сайынғы конференциясы өтті.
Осы шара аясында AlmaU Құрметті профессоры Пан Сук Ким ASPA президенті Джон Бартл мен ASPA атқарушы директоры Уильям Шилдс қолынан марапат алды. Бұл марапат оның ASPA халықаралық директоры ретіндегі қызметін мойындау мақсатында берілді. Пан Сук Ким осы лауазымға 2020 жылдың көктемінде сайланып, жалпы алты жыл бойы қызмет атқарды. Конференцияда профессор «Өзара байланысты әлемде ASPA-ның рөлі: байланыстар мен мүмкіндіктер» атты презентациясын ұсынды.
ASPA – мемлекеттік басқару, саясат және мемлекеттік сектор саласындағы мамандарды біріктіретін кәсіби ұйым. Ол тиімді және этикалық мемлекеттік басқаруды ілгерілетуге, мемлекеттік қызметкерлердің кәсіби дамуын қолдауға, зерттеулер жүргізуге және тәжірибе алмасуға бағытталған. ASPA мемлекеттік басқару саласындағы кәсібилік пен этикалық стандарттарды дамытуға негізгі платформа болып табылады, мемлекеттік институттардың тиімділігін арттыруға ықпал етеді және қоғам мүддесіне бағытталған, ашық және сенімді мемлекеттік басқару жүйесін қалыптастыруға көмектеседі.