Алматы Менеджмент Университетінің (AlmaU) Саясат және құқық мектебі студенттердің академиялық және тәжірибеге бағытталған мүмкіндіктерін кеңейту бойынша стратегиялық саясатын жалғастыруда. Бұл жолдағы келесі қадам 2025 жылғы 14 мамырда «Халықаралық құқық қорғау орталығы» республикалық қоғамдық бірлестігімен ынтымақтастық туралы меморандумға қол қою болды.
Меморандумға қол қоюға Қазақстан медиаторлар қауымдастығының бас директоры, «Халықаралық құқық қорғау орталығы» РҚБ президенті Жанділда Жақыпов қатысты.
Тараптар ынтымақтастықтың келесі бағыттарын жүзеге асыруға келісті:
- Оқу жоспарлары мен элективті курстарды бірлесіп әзірлеу;
- Оқытылатын пәндердің жұмыс оқу жоспарлары мен бағдарламаларын сараптамалық бағалау;
- Ғылыми конференциялар, дөңгелек үстелдер ұйымдастыру және оларға қатысу;
- Бірлескен ғылыми жобаларды құру;
- Сарапшы-практиктердің қонақтық лекцияларын, шеберлік сабақтарын және презентацияларын өткізу;
- Мамандандырылған көрмелер ұйымдастыру;
- Магистранттардың өндірістік және ғылыми тағылымдамадан өтуіне мүмкіндік беру;
- Серіктестік ұйымда студенттік тәжірибеден өтуге көмек көрсету;
- Әлеуметтік-экономикалық дамудың өзекті мәселелері бойынша студенттердің ғылыми жұмыстарының конкурстарын өткізу;
- Ақпараттық және сараптамалық ресурстарға қолжетімділікті қамтамасыз ету.
Жетекші қоғамдық және құқық қорғау ұйымдарымен серіктестіктің арқасында Саясат және құқық мектебінің студенттері оқу барысында кәсіби ортаға ену мүмкіндігіне ие болды.