Almaty Management University (AlmaU) базасында Shakhmardan Yessenov Foundation қоры жүзеге асыратын Қазақстандағы деректерді талдау және жасанды интеллект саласындағы жетекші білім беру жобаларының бірі – Yessenov Data Lab (YDL) жазғы мектебінің офлайн кезеңі басталды. Университет бірнеше жылдан бері бағдарламаның тұрақты серіктесі ретінде білім беру интенсивінің қорытынды бөлігін өткізу үшін өз алаңын ұсынып келеді.
YDL жазғы мектебі төрт апта бойы өткізіліп, конкурстық іріктеуден өткен еліміздің түкпір-түкпірінен келген талантты студенттер мен жас мамандарды біріктіреді. 2026 жылы бағдарламаға қатысу үшін 159 өтінім қабылданып, оның қорытындысы бойынша 20 қатысушы грант иегері атанды. Оқу бағдарламасы үлкен деректерді талдау, машиналық оқыту және жасанды интеллект негізіндегі шешімдерді әзірлеу саласындағы құзыреттерді дамытуға бағытталған.
Оқудың алғашқы екі аптасы онлайн форматта өтсе, қорытынды офлайн модулі AlmaU базасында ұйымдастырылады. Университетте қатысушыларды үлкен тілдік модельдермен (LLM) жұмыс істеу, ЖИ-агенттерді әзірлеу және Data Science саласындағы заманауи тәсілдерге арналған қарқынды сабақтар күтеді. Дәрістерді Ұлыбританиядағы Sage UK компаниясының машиналық оқыту жөніндегі жетекші инженері Саед Хуссейн және АҚШ-тағы University of California, Berkeley университетінің Data Science саласындағы зерттеушісі, магистранты Карл Иллюстрисимо өткізеді.
AlmaU базасында жазғы мектептің өткізілуі университеттің цифрлық технологиялар, жасанды интеллект және жаңа буын мамандарын даярлау бағытындағы стратегиялық даму бағытына толық сәйкес келеді. Қатысушылар деректерді талдаудың заманауи құралдарын меңгеріп қана қоймай, салада танылған сарапшылардың жетекшілігімен нақты деректер негізінде өз жобаларын жүзеге асыру мүмкіндігіне ие болады.
AlmaU мен Yessenov Data Lab арасындағы серіктестік Data Science саласындағы кәсіби қауымдастықтың дамуына, университеттің жетекші білім беру және ғылыми ұйымдармен ынтымақтастығын нығайтуға, сондай-ақ қазіргі цифрлық экономиканың сын-қатерлеріне жауап бере алатын сұранысқа ие мамандарды даярлауға қолайлы жағдай жасауға ықпал етеді.