Әзірбайжанға сапар аясында AlmaU және Azərbaycan Universiteti делегацияларының арасында жұмыс кездесуі өтті. AlmaU тарапынан кездесуге университет президенті Асылбек Кожахметов және Бизнес магистратурасы мектебінің деканы Ксения Южанинова-Караденизли, ал Azərbaycan Universiteti тарапынан ғылыми жұмыс жөніндегі проректор Юсиф Гасымов, ректор кеңесшісі және Халықаралық магистратура мен докторантура орталығының директоры Нушабэ Гулиева, сондай-ақ Халықаралық байланыстар бөлімінің жетекшісі Эльмира Исмаилова қатысты.
Кездесу барысында тараптар 2018 жылы қол қойылған Меморандумдағы міндеттемелерді орындау мәселелерін талқылады және ынтымақтастықты кеңейту мүмкіндіктерін қарастырды. Арнайы назар жаңа ынтымақтастық бағыттарына, бірлескен ғылыми-зерттеу жобаларын жүзеге асыруға, студенттер мен оқытушылардың алмасуын белсендіруге, MBA бағдарламасы бойынша өзара әрекеттесуге және тәжірибе алмасуға аударылды.
Сонымен қатар, Әзірбайжан мен Қазақстан университеттері арасындағы стратегиялық әріптестікті нығайту, жоғары білімді жаһандық шақыруларға бейімдеу жолдары және оқу бағдарламаларының халықаралық аккредитациясы мәселелері талқыланды.
Azərbaycan Universiteti – 1991 жылы құрылған Әзірбайжанның алғашқы жеке университеті. 30 жылдан астам тарихы бойына университет елдің жетекші білім беру және ғылыми алаңы ретінде танылып, заманауи бакалавриат, магистратура және докторантура бағдарламаларын жүзеге асырып, халықаралық ынтымақтастықты дамытып, ғылыми зерттеулерді ынталандырып, әртүрлі білім салаларында жоғары білікті мамандарды дайындауда жоғары деңгейге қол жеткізді.
