Almaty Management University (AlmaU) студенттері Азиядағы беделді халықаралық жарыстарда жоғары нәтиже көрсетіп, Қазақстанның спорттық абыройын халықаралық аренада лайықты қорғады.
AlmaU-дың «Қоғаммен байланыс» білім беру бағдарламасының 2-курс студенті Алихан Айтқазы 2026 жылғы 18–19 шілде күндері Гонконгта өткен Asian Cup Cadets & Junior Hong Kong 2026 халықаралық турнирінің жеңімпазы атанды. Кадеттер мен жасөспірімдер арасындағы Азия кубогына 14 елден 250-ден астам спортшы қатысты.
73 келіге дейінгі салмақ дәрежесінде Алихан жарыстың барлық кезеңінен сүрінбей өтіп, Аустралия, Моңғолия, Сауд Арабиясы және өзге де елдердің спортшыларын жеңді. Финалдық белдесу небәрі 11 секундта аяқталып, қазақстандық спортшы қарсыласын иппон әдісімен мерзімінен бұрын жеңіп, турнирдің алтын медалін иеленді.
Қазақстан қоржынына тағы бір жүлдені AlmaU-дың «Кәсіпкерлік саласындағы бизнесті басқару» білім беру бағдарламасының 2-курс студенті Алишер Сакимов салды. Алматы қаласында өткен және 25 елден мыңға жуық спортшының басын қосқан Джиу-джитсудан Азия чемпионатында ол күміс жүлдегер атанды.
Финалға дейінгі жолда Алишер Үндістан, Қырғызстан, Оңтүстік Корея, Тәжікстан және Біріккен Араб Әмірліктерінің спортшыларынан басым түсіп, жарыс қорытындысында тұғырдың екінші сатысына көтерілді.
Екі спортшы да кәсіби спорттағы жетістіктерін AlmaU-дағы білім алумен қатар алып жүр. Олардың жеңістері қазақстандық спортшылардың халықаралық жарыстардағы табысты өнер көрсетуінің жарқын көрінісі болып, еліміздегі жекпе-жек өнері мектебінің жоғары деңгейін тағы бір мәрте дәлелдеді.
Жас спортшылардың Азияның ең ірі турнирлеріндегі жеңістері – олардың жеке жетістігі ғана емес, сонымен қатар Қазақстанның халықаралық спорт аренасындағы беделін нығайтуға қосқан маңызды үлесі.