2026 жылдың 12 ақпанында Қазақстан Республикасының Қаржы нарығын реттеу және дамыту агенттігінің қолдауымен AlmaU университеті мен Сақтандыру компаниясы «Freedom Finance Insurance» АҚ арасында ынтымақтастық туралы меморандумға ресми түрде қол қойылды. Серіктестік университет, студенттер және жұмыс беруші арасындағы өзара әрекеттесулердің тұрақты экожүйесін қалыптастыруға бағытталған.
Стратегиялық әріптестіктің негізгі мақсаты – тәжірибеге бағдарланған оқыту мен стипендиялық бағдарламаларды іске асыру арқылы Қазақстанның сақтандыру және қаржы нарығы үшін сұранысқа ие мамандар даярлау.
Келісім аясында бес жыл ішінде үш негізгі бағыт бойынша кешенді бағдарлама жүзеге асырылмақ:
– конкурстық тестілеу және академиялық іріктеу жүйесі арқылы үздік студенттерді анықтау және қолдау, 100%-ға дейінгі гранттық қаржыландыру ұсыну және серіктестің бейіндік мүмкіндіктеріне қолжетімділік беру;
– қаржы-экономикалық, IT және аналитикалық бағыттарда білім алатын студенттерге арналған майнор бағдарламаларын дамыту, сақтандыру, қаржылық талдау және data science салаларында арнайы курстарды Freedom Finance Insurance сарапшыларының қатысуымен іске қосу, бұл студенттердің практикалық дағдыларын қалыптастырып, нақты кейстермен жұмыс істеуіне мүмкіндік береді;
– сақтандыру бизнесі, инвестициялық қызмет және қаржы технологиялары бағыттары бойынша тереңдетілген профильдік магистратура бағдарламасын ашу.
Сақтандыру компаниясы «Freedom Finance Insurance» АҚ басқарма төрағасыАзамат Керимбаев сақтандыру секторының өсу әлеуеті жоғары екенін және жаңа кадрлық шешімдерді талап ететінін атап өтті: «Бүгінде нарыққа тек актуарийлер ғана емес, сонымен қатар заңгерлер, IT – мамандар, аналитиктер, сақтандыру өнімдерін әзірлеушілер және қаржылық деректер бойынша мамандар қажет. Заңнаманың жаңартылуы және қаржы секторының үйлестірілуі білікті кадрларға деген сұранысты арттырады. Университет пен бизнестің бірлескен бастамасы кадр тапшылығын азайтуға мүмкіндік береді».
AlmaU президенті Асылбек Кожахметов білім беру мен бизнес өзара әрекеттесуінің жаңа моделінің тиімділігін атап өтті: «Біз заманауи университеттер жұмыс беруші компаниялармен тығыз байланыста болып, студенттерге тек іргелі білім беріп ғана емес, еңбек нарығында сұранысқа ие практикалық құзыреттерді де қалыптастыруы тиіс деп есептейміз».
Аталмыш бірлескен бағдарлама Қазақстанның сақтандыру және қаржы секторы үшін кадрлар даярлаудың тұрақты экожүйесін қалыптастыруға, дарынды студенттердің әлеуетін ашуға және саланы жаңа буын мамандарымен қамтамасыз етуге мүмкіндік береді. Тараптар бұл ынтымақтастықты адами капиталға бағытталған ұзақ мерзімді инвестиция ретінде қарастырады. Freedom Finance Insurance сарапшыларының оқу процесіне қатысуы, арнайы курстар мен тәжірибеге бағдарланған сабақтарды өткізу жоспарлануда. AlmaU университеті өз кезегінде академиялық базаны, әдістемелік қолдауды және бағдарламаның іске асырылу сапасын мониторингтеуді қамтамасыз етеді. Тараптар бірлескен бағдарламаның Қазақстанның сақтандыру нарығын дамытуға елеулі үлес қосатынына және AlmaU-дың елдегі жетекші университеттердің бірі ретіндегі позициясын одан әрі нығайтатынына сенім білдірді.
