AlmaU AMBA & BGA Excellence Awards 2027 беделді халықаралық сыйлығының Best CSR and Sustainability Initiative номинациясында әлем бойынша алты финалистің қатарына енді.
Бұл номинация тұрақты даму және әлеуметтік жауапкершілік қағидаттарын білім беру үдерісіне жүйелі түрде енгізіп, қоғамның дамуына практикалық әрі өлшенетін үлес қосып келе жатқан бизнес-мектептерді атап өтеді.
AlmaU өтінімінде университеттің тұрақты даму саласындағы жүйелі жұмысы, соның ішінде Тұрақты даму орталығының қызметі, Тұрақты даму мақсаттарын (ТДМ) білім беру және зерттеу үдерістеріне интеграциялау, мемлекеттік құрылымдармен, бизнеспен және халықаралық ұйымдармен серіктестік, сондай-ақ экологиялық және әлеуметтік бастамаларды жүзеге асыруы ұсынылды.
Өтінімде ұсынылған негізгі жобалардың бірі – Syr Qorany – Sekseýil, Арал теңізінің экожүйесін қалпына келтіруге бағытталған AlmaU-дың жыл сайынғы бастамасы. 2024-2025 жылдары университет студенттері мен серіктестері 23 000-нан астам қара сексеуіл көшетін отырғызды, осылайша экологиялық волонтерлікті, практикалық оқытуды және сектораралық ынтымақтастықты біріктірді.
AlmaU-мен бірге номинацияның қысқа тізіміне Испания, Ирландия, Үндістан, Қытай және Мароккодан бизнес-мектептер енді.
AlmaU-дың AMBA & BGA Excellence Awards 2027 финалына шығуы университеттің жауапты басқару білімін дамытуға және Қазақстан мен Орталық Азияда тұрақты даму күн тәртібін ілгерілетуге қосқан үлесінің халықаралық деңгейде мойындалғанын көрсетеді.